У «ДНР» хочуць судзіць байца палка Каліноўскага

• 17.09.2024, 10:14

Ён больш за два гады знаходзіцца ў палоне.

«Пракуратура» тэрарыстаў з «ДНР» накіравала ў суд справу ў дачыненні да байца палка Каліноўскага Яна (Трамблі) Дзюрбейкі.

Як гаворыцца ў паведамленні, у перыяд з лютага да ліпеня 2022 года Дзюрбейка прымаў удзел у баявых дзеяннях на баку Украіны ў розных мясцінах баявога судотыку.

Яго завочна абвінавацілі паводле ч. 3 арт. 359 КК РФ (удзел найміта ва ўзброеным канфлікце) і абвясцілі ў міжнародны вышук. Раней суд абраў у дачыненні да яго меру стрымання ў выглядзе ўзяцця пад варту.

Нагадаем, Ян Дзюрбейка ўжо больш за два гады знаходзіцца ў палоне, куды трапіў падчас бою ў Лісічанску 26 чэрвеня 2022 года. Разам з ім у палоне тады апынуўся яшчэ адзін добраахвотнік - Сяргей Дзягцеў. Дзе яны ўтрымліваюцца і што з імі зараз, невядома.