Аналітык назваў ролю Вэнса ў «мірным плане Трампа»

• 15.09.2024, 11:08

Кандыдат у віцэ-прэзідэнты ЗША выконваў адмысловую місію.

Агучаны кандыдатам у віцэ-прэзідэнты ЗША ад рэспубліканцаў Джэй Ды Вэнсам мірны план Дональда Трампа, зараз выявіўся не планам Трампа, а самога Вэнса.

Аб гэтым сказаў вайскова-палітычны аглядальнік Аляксандр Каваленка. «У заходніх СМІ ўжо згадваюць яго як план Вэнса, але не Трампа», - адзначыў ён.

Аналітык зазначыў, што такі ўкід быў праверкай рэакцыі. «Рэакцыя выявілася надта негатыўнай і ўсю віну ўсклалі на Ды Джэя», - падкрэсліў Каваленка.

Ён выказаў меркаванне, што гэта этап спроб і памылак каманды Трампа, у якой рэальнага плана, «як можна меркаваць - няма».

«І роля Вэнса ў камандзе Трампа ўжо таксама выразна вызначылася - роля амбразурнага мяса», - канстатаваў Каваленка.

12 верасня кандыдат у віцэ-прэзідэнты ЗША ад рэспубліканцаў Джэй Ды Вэнс распавёў, якім бачыць план Трампа па заканчэнні вайны ва Украіне.

«Гэта выглядае так: Трамп садзіцца і гаворыць расейцам, украінцам і еўрапейцам: «Вы, хлопцы, павінны высветліць, як выглядае мірнае ўрэгуляванне». І, магчыма, яно будзе выглядаць прыкладна гэтак жа, як цяперашняя лінія размежавання паміж Расеяй і Украінай. Гэта стане як дэмілітарызаваная зона. Яна будзе моцна ўмацаваная, каб РФ не ўварвалася зноў», - сказаў ён.