У Віцебску асудзілі лекара з 30-гадовым стажам

• 12.09.2024, 11:13

Ігар Дзямідчык - спецыяліст у галіне ультрагукавой дыягностыкі.

У Віцебску лекара асудзілі паводле абвінавачання ў распаўсюджванні нацысцкай сімволікі і экстрэмісцкай інфармацыйнай прадукцыі, паведамляе «Віцебская Вясна».

58-гадовы Ігар Дзямідчык - спецыяліст у галіне ультрагукавой дыягностыкі. У яго 33 гады працоўнага стажу і першая кваліфікацыйная катэгорыя. Водгукі ў інтэрнэце аб яго прафесійнай дзейнасці выключна станоўчыя.

Дзямідчыка асудзілі ў судзе Першамайскага раёну Віцебску, аднак ён абскардзіў прысуд. 13 верасня ягоную скаргу будзе разглядаць Віцебскі абласны суд.

Як вядома, для суда «за экстрэмізм» чалавеку дастаткова мець у сацсетках спасылку на інтэрнэт-рэсурс, прызнаны «экстрэмісцкім». А за «распаўсюд нацысцкай сімволікі» сілавікі ўважаюць нават гістарычныя фатаграфіі.

Як адзначаюць праваабаронцы, усе сацсеткі Ігара Дзямідчыка ўжо выдаленыя.