Блінкен і кіраўнік брытанскага МЗС едуць у Кіеў

• 11.09.2024, 9:50

Яны агучаць пастанову аб дальнабойных ударах па РФ.

Дзяржсакратар ЗША Энтані Блінкен наведае Украіну 11 верасня разам з міністрам замежных спраў Вялікабрытаніі Дэвідам Лэмі. Пра гэта паведаміў прадстаўнік Дзяржаўнага дэпартамента ЗША Мэцью Мілер у сацсетцы Х.

Паводле ягоных слоў, мэта паездкі - прадэманстраваць сталую падтрымку абароны Украіны ад расейскай агрэсіі і паглыбіць супрацоўніцтва і падтрымку Украіны.

Палітыкі таксама наведаюць Польшчу 12 верасня.

У сувязі з гэтым амерыканская журналістка Джулігрэйс Бруфке працытавала старшыню камітэта Палаты прадстаўнікоў у замежных справах Майкла Макола, у якога яна брала інтэрв'ю. Ён сказаў: «Я размаўляў з Блінкенам два дні таму, і ён едзе са сваім калегам з Вялікабрытаніі ў Кіеў, каб, фактычна, сказаць ім, што яны дазволяць ім [нанесці ўдар па Расеі з дапамогай ATACMS]».