Аўтобус Вільня - Магілёў з'ехаў у кювет пад Беразіно

• 21.08.2024, 10:51

Пяць чалавек адвезлі ў шпіталь.

Раніцай у сераду, 21 жніўня, пасажырскі аўтобус, які рухаўся па маршруце Вільня — Магілёў, з'ехаў з трасы ў кювет у Бярэзінскім раёне. У выніку аварыі пацярпелі пяць чалавек, паведамляе тэлеграм-канал "Березино Новости".

Інцыдэнт адбыўся а 4:30 раніцы на трасе М4 Менск - Магілёў, недалёка ад вёскі Мартыянаўка. Паводле папярэдніх звестак, кіроўца аўтобуса мог заснуць за стырном, што і прывяло да з'езду ў кювет.

У момант аварыі ў салоне знаходзіліся 19 пасажыраў. Пяцёра з іх былі дастаўленыя ў лякарню, аднак пасля агляду лекары адпусцілі іх дадому. Астатнія пасажыры не пацярпелі і абышліся толькі спалохам.