У Фінляндыі раскрылі дэталі парушэння мяжы расейскім караблём

• 27.07.2024, 15:18

Карабель прайшоў блізу 1,2 марскіх міляў у тэрытарыяльных водах краіны.

Расейскі карабель падазраюць у парушэнні марскіх межаў Фінляндыі.

Пра гэта паведамляе Yle.

Паводле звестак Памежнай аховы, гаворка ідзе пра расейскі навукова-даследчы карабель «Міхаіл Казанскі». Ён увайшоў у тэрытарыяльныя воды Фінляндыі ў раёне на поўдзень ад Хаміна.

Перасячэнне мяжы было зафіксаванае сістэмамі назірання Памежнай аховы, а таксама патрулём Берагавой аховы. Карабель прайшоў блізу 1,2 марскіх міляў у тэрытарыяльных водах Фінляндыі.

Патрульны катар Берагавой аховы падчас інцыдэнту знаходзіўся побач з расейскім караблём. Таксама было зроблена некалькі спробаў звязацца з караблём «Міхаіл Казанскі» праз радыёсувязь, аднак спробы не ўвянчаліся поспехам.

Памежная ахова расследуе здарэнне як парушэнне тэрытарыяльных межаў.