Жыхары Гародні сталі ў чэргі, каб перарэгістраваць аўто
- 26.07.2024, 16:37
Праз новыя абмежаванні на ўезд аўто ў ЕЗ.
У апошнія некалькі дзён каля рэгістрацыйнага падраздзялення ДАІ УУС Гарадзенскага аблвыканкама збіраюцца вялікія чэргі.
Кіроўцы імкнуцца барзджэй перааформіць аўтамабілі - гэта звязана з тым, што Польшча перастала пускаць аўто на беларускіх нумарах без уладальнікаў у салоне.
У дапамогу гарадзенскім супрацоўнікам нават накіравалі работнікаў з галоўнай управы, а працягласць работы рэгістрацыйнага падраздзялення павялічаная - цяпер яно адкрыта з 7.00 да 17.00.
Акрамя таго, у МУС сцвярджаюць, што супрацоўнікі пераафармляюць аўто за дзень, хаця згодна з законам яны могуць рабіць гэта на працягу сямі дзён.
Нагадаем, Латвія і Эстонія забаранілі ўезд на сваю тэрыторыю аўто з беларускімі нумарамі. Аналагічную забарону ўвяла і Літва, аднак да 16 жніўня аўто з уладальнікам усё яшчэ можна будзе ўязджаць у краіну.
Польшча ад поўнай забароны пакуль адмовілася, але ўвяла такую ж меру - праз мяжу прапускаюць толькі беларускія аўто з уладальнікам у салоне.