Беларусы сутыкнуцца з чарговай пенсійнай зменай

• 26.07.2024, 17:52

Яна яшчэ больш ускладніць жыццё некаторых грамадзян.

З 2025 года ў Беларусі падвысяць мінімальны страхавы стаж. Ён неабходны для атрымання працоўнай пенсіі. У гэты стаж уваходзіць толькі той час, калі вы працавалі і працадаўца плаціў за вас страхавыя ўнёскі ў Фонд сацабароны. Цяпер мінімальны страхавы стаж складае 19 гадоў 6 месяцаў. З 1 студзеня 2025 года ён вырасце на паўгода - да 20 гадоў, удакладняе «Зеркало» са спасылкай на сацслужбы.

Нагадаем, у 2013 годзе гэты паказчык павялічыўся з пяці да дзесяці год. Беларусы, якія не выпрацавалі страхавы стаж згодна з новымі правіламі, трапляюць у пенсійную пастку, яны не могуць прэтэндаваць на працоўную пенсію, ім могуць прызначыць толькі сацыяльную: мужчыны - з 65 гадоў, жанчыны - з 60 гадоў. Цяпер сацыяльная пенсія складае 209,37 рубля, а з 1 жніўня яе павысяць да 216,5 рубля.

Раней, з 1 студзеня 2020 года, у страхавы стаж пачалі ўключаць тэрміновую службу ў войску. Гэтую навіну на стадыі абмеркавання не падтрымлівалі ў Мінпрацы і Мінфіне. Пры гэтым вучобу ў ВНУ і дэкрэтны адпачынак, уключэнне ў страхавы стаж якіх абмяркоўвалася разам са службай у войску, улады змен не прынялі.

З 2025 года таксама ўвядуць змяненні ў разліку і прызначэнні пенсій. З наступнага года перыяд, за які бяруць заробак для разліку гэтых выплат, падвысяць на адзін год - да 31 года бесперапыннага стажу працы. Цяпер для разліку пенсіі бяруць заробак за апошнія 30 гадоў працы запар (ці менш, калі прапрацавалі менш за гэты перыяд).