Магутныя выбухі ў Крыме: гарыць аэрадром «Сакі»
- 26.07.2024, 7:36
Чутная дэтанацыя боепрыпасаў акупантаў.
Уночы ў пятніцу, 26 ліпеня, у Крыме пагрымела серыя выбухаў, якія былі чутныя ў Новафёдараўцы, у раёне Акунёўкі і Сімферопалі.
Паводле звестак СМІ, на акупаванай паўвыспе гарыць аэрадром «Сакі» ў Новафёдараўцы і чуваць дэтанацыю боепрыпасаў.
Як піша Telegram-канал "Крымскі вецер", спачатку ў Севастопалі абвяшчалася балістычная небяспека, але потым яе скасавалі.
«02:41 ужо 13 магутных выбухаў, чуваць гул ракет, бахае з усіх бакоў - з боку Дабрушына, з боку Еўпаторыі, з боку Новаазёрнага і дзесьці далёка хутчэй за ўсё ў Саках», - паведамляе канал са спасылкай на падпісчыка.
«У Еўпаторыі прылёты. Штук пяць ужо было. Пасля першага і пятага нават сірэну секунд на пятнаццаць уключалі», - дадалі на канале.
Мясцовыя жыхары паведамілі пра пажар на аэрадроме «Сакі» ў Новафёдараўцы, там таксама чуваць дэтанацыю боепрыпасаў.
Акрамя гэтага, магутныя выбухі былі чуваць у раёне Акунёўкі і ў Сімферопалі.
У Севастопалі мясцовыя ўлады паведамілі аб нападзе БПЛА.
У Сеціве таксама з'явіліся відэа працы расейскай СПА і пажараў.