«Калі б крэдыт на жыллё быў пад 5% гадавых, я адразу ж зацяжарала б»

• 13.07.2024, 13:31

Відэа на дэмаграфічную тэму выклікала гарачую палеміку ў беларусаў.

Беларускія дэмографы б'юць трывогу і прапануюць тэрмінова павялічваць нараджальнасць. Але ці магчыма гэта ў цяперашніх умовах? Пад відэа «Салідарнасці» ў TikTok разгарэлася палеміка.

Ролік сабраў амаль 600 каментароў, журналісты выбралі самыя цікавыя выказванні.

«Павысіць узровень заробкаў, зменшыць кошт і адсоткавую стаўку на жыллё, зменшыць падаткі».

«З маёй сям'і ўсе, хто мае дзяцей да 18 гадоў, жывуць па-за межамі РБ. 9 сем'яў з дзецьмі. Сярод маіх аднакласнікаў – 7 з 21».

«У мяне тры сыны, і я ім кажу, што мне не патрэбныя ўнукі ў РБ».

«Сёння дачка пайшла з сяброўкай на шпацыр па “ўрадлівых месцах”, каву папіць. І нікуды не патрапіла, людзей мора».

«На мне мой род і скончыцца».

«Калі б крэдыт на жыллё быў пад 5% гадавых, я адразу ж зацяжарала б. Вось дакладна. А пакуль мы не ў стане з нашымі заробкамі сябе жыллём забяспечыць, то пра якіх дзяцей гаворка можа быць?»

«Вінаватыя нашы людзі. Наглядзяцца серыялаў пра прынцаў і чакаюць багатых».

«Для таго каб пазнаёміцца ў наш час, спачатку кветкі і мінімум 5 тысячаў заробак».

«Я ката не магу забяспечыць».

«Проста няма за што жыць, калі працоўная сям'я. Ежа такая-сякая і камуналка – вось і ўсё, на астатняе не стае, няхай яны зразумеюць гэта».

«Кватэру не набыць з сярэднім заробкам, машыну новую – з цяжкасцю, шмоткі на дзіця каштуюць як на дарослага (пры гэтым яно расце хутка). І яшчэ шмат чаго адпужвае моладзь».

«За першае дзіця кватэру даваць – і будуць вам дзеці. Нараджаць у здымную – безадказна. Сваю кватэру набыць амаль нерэальна ў 25 гадоў. А ў 45–50 ужо і не народзіш».

«Чарга па апастыль у Мінаду наўпрост крычыць пра стабільнасць і наяўнасць перспектываў для моладзі».

«Дайце мне з мужам хоць бы інтэрнат, і я нараджу. А пакуль на здымнай – хрэн вам».