Ашуканцы прыдумалі схему падману беларусаў ад імя ФСАН
- 28.05.2024, 10:48
Як яна працуе.
У міліцыі расказалі аб новай схеме падману беларусаў. Цяпер аферысты прадстаўляюцца супрацоўнікамі Фонду сацыяльнай абароны насельніцтва (ФСАН) і пагражаюць пакінуць без пенсіі. На такі хітрык трапілася мянчанка, якая ў выніку пазбавілася амаль 70 тысяч рублёў, паведамляе прэс-служба МУС.
У міліцыю звярнулася мянчанка, паджылая маці якой перадала кур'еру тэлефонных ашуканцаў амаль 70 тысяч рублёў у эквіваленце.
Характэрна, што грошы забрала 60-гадовая выкладчыца сталічнай ВНУ, якая і сама стала ахвярай аферыстаў. У мэсэнджары ёй патэлефанаваў незнаёмец, які прадставіўся супрацоўнікам ФСАН і запатрабаваў удакладніць асабістыя звесткі, а таксама загрузіць электронны дадатак. Ён пагражаў, што ў выпадку адмовы жанчыне перастануць плаціць пенсію.
Пасля таго як пенсіянерка ўстанавіла дадатак, з яе рахунку спісалі грошы. Ёй адразу ж паступіў званок ад іншага незнаёмца. Мужчына ад асобы Дэпартамента фінансавых расследаванняў запэўніў, што ў сувязі з крадзяжом грошай распачатая ўжо праверка, аднак злачынцы паспелі ад яе імя аформіць заяўку на крэдыт.
Каб дапамагчы ў іх злове, мянчанка па камандзе куратараў узяла ў трох банках крэдыты на агульную суму больш за 30 тысяч рублёў і перавяла іх на спецыяльныя рахункі. Узамен у мэсэнджэры ёй даслалі падробленыя даведкі аб датэрміновай выплаце ўсіх пазык. Пасля выкладчыцу папрасілі дапамагчы паджылай мянчанцы, у якой «праблемы са здароўем». Ёй трэба было забраць у пенсіянеркі грошы і таксама пакласці іх на рахунак.
Выкладчыца выканала ўсе ўказанні махляроў. Неўзабаве пасля таго, як яна забрала ў пенсіянеркі амаль 70 тысяч рублёў у эквіваленце, яе затрымалі.
Распачатая крымінальная справа.