Францыя будзе ўдзельнічаць у набыцці 800000 снарадаў для Украіны
- 5.03.2024, 21:35
Парыж падтрымаў ініцыятыву Прагі.
Францыя падтрымлівае чэшскую ініцыятыву набыцця 800 тысячаў артылерыйскіх снарадаў для Украіны і будзе ў ёй удзельнічаць.
Пра гэта заявіў прэзідэнт Францыі Эмануэль Макрон, паведамляе Bloomberg.
«Чэшская ініцыятыва надзвычай карысная, мы яе падтрымліваем, мы будзем у ёй удзельнічаць. Яна заключаецца ў тым, каб шукаць боепрыпасы ўсюды, дзе яны даступныя і сумяшчальныя з пастаўленым намі абсталяваннем», – адзначыў Макрон падчас сустрэчы з прэзідэнтам Чэхіі Пятром Павелам.
Гаворачы пра сродкі на набыццё боепрыпасаў Макрон расказаў, што «гэта можа быць двухбаковая мабілізацыя, супрацоўніцтва з трэцімі бакамі, двухбаковае фінансаванне, таксама як і еўрапейскае фінансаванне».
Ён дадаў, што для набыцця боепрыпасаў можна задзейнічаць і Еўрапейскі фонд міру.