«Плануем выкупіць усю вёску»
- 5.03.2024, 20:37
Беларусы паказалі, якія дамы набылі за «адну базавую».
У TikTok пачалі масава публікаваць відэа з дамамі за адну базавую велічыню (у 2024 годзе – 40 рублёў, у 2023 – 37). Што беларусы набылі за такія грошы?
Некалькі гадоў таму дзяржава прапанавала беларусам набываць закінутыя дамы ў вёсцы. Усе даступныя прапановы збіраюцца ў Адзіным рэестры пустых дамоў. Для тых, хто марыць мець сваю хатку ў вёсцы, гэта можа стаць варыянтам набыцця такой нерухомасці. Сваімі знаходкамі беларусы пачалі дзяліцца ў Tik-Tok збіраючы іх пад тэгам #домзааднабазавую.
«25 сотак зямлі… ці дрэваў»
У каментарах helen…777 расказала, што дом з надзелам у в. Забалацце (Бялыніцкі раён) яны з сям'ёй знайшлі праз рэестр і набылі даволі хутка. Надумалі пашырыць надзел да 50 сотак. На ўсю працэдуру з афармленнем патрацілі блізу 700 рублёў.
«У нашых планах выкупіць усю вёску»
Карыстальніца з нікам dommeshta таксама расказала пра дом, набыты за 37 беларускіх рублёў.
«Месцазнаходжанне я называць не буду, але скажу, што больш за 4 гады месца, дзе побач будуць хваёвы лес, рэчка і адасобленае становішча. У нашых планах выкупіць усю вёску», – адзначыла дзяўчына.
У каментары да відэа яна падзялілася задумкай і расказала, што плануюць з мужам «развіваць славянскія традыцыі, дапамагаць людзям і душэўна адпачываць, атрымліваючы асалоду ад заходу».
У профілі карыстальніцы ўжо шмат відэа з аглядам дома і адказамі на пытанні падпісчыкаў.
Хлопец з нікам na_dache_sami паказаў надзел, які набыў за адну базавую велічыню ў Гомельскай вобласці. На тэрыторыі прысутнічаюць некалькі гаспадарчых пабудоваў, кучы смецця. Сам дом у даволі запушчаным стане. Мужчына дзеліцца падрабязным аглядам і этапамі праведзенай працы на сваёй старонцы.
«Працы непачаты край. Лепш нельга было знайсці?» – пацікавіўся адзін з каментатараў, на што мужчына адказаў, што пры выбары дома ў прыярытэце стаяла ягонае месцазнаходжанне.
«Месца для добрага лецішча»
Беларус з нікам sveremeychik паказаў дом, які набыў за адну базавую ў Менскім раёне. На тэрыторыі «дом, прыбудовы з надзелам 10 сотак».
«1 базавая велічыня (14$) + выдаткі выканкама (220$). Далей падключэнне святла, пераафармленне чакае і г.д. Яшчэ не ведаю на колькі выйдзе», – адказаў мужчына на пытанне пра кошт аднаму з каментатараў.