Другі за дзень: УСУ збілі яшчэ адзін Су-34 расейцаў

• 27.02.2024, 17:13

За апошнія дні ўкраінцы знішчылі ўжо 10 самалётаў Расеі.

Украінскія вайскоўцы збілі яшчэ адзін расейскі знішчальнік-бамбавік Су-34. Ён стаў другім за дзень і дзясятым за апошні час.

Пра гэта паведамляе Charter97.org са спасылкай на Telegram камандуючага Паветраных сіл Мікалая Алешчука.

«Блізу 14.00 адпрацавалі па чарговым Су-34. Кірунак - той жа!

Цэль - нязменная!» - напісаў ён.

Генерал адзначыў, што пры такіх стратах баявой і спецыяльнай авіяцыі расейцы павінны задумацца і, прынамсі, на час спыніць «авіяцыйныя мясныя штурмы».

«Што ж, працуем далей. Да перамогі», - дадаў Аляшчук.

За апошнія дні УСУ знішчылі ўжо 10 самалётаў расейцаў, у тым ліку гэты. Літаральна раніцай 27 лютага стала вядома аб «прызямленні» такога ж расейскага борта днём раней, 26 лютага.