У Менску здаюць дом у арэнду за рэкордную суму

• 27.02.2024, 9:02

За што прапануюць плаціць $6 тысяч за месяц?

У Менску здаюць у доўгатэрміновую арэнду дом за рэкордную суму - 6000 даляраў. Жыллё знаходзіцца ў прыватным сектары мікрараёна Зялёны Луг. "Зеркало" паглядзела, за што трэба плаціць такія грошы.

У чатырохузроўневым катэджы плошчай больш за 700 «квадратаў» раней знаходзіўся прыватны дзіцячы садок. Цяпер нерухомасць надумалі здаць у арэнду на працяглы тэрмін (не менш за год).

У доме - сем спальняў, восем санвузлоў, кухня-сталовая, гасцёўня з камінам, гардэробныя, трэнажорная зала, пральны пакой. Маецца зона спа з пераліўным 12-метровым басейнам, аўтаномным джакузі, вадзяной гарматай, гідрамасажам, саўнай з душавой і пакоем адпачынку. Ёсць тэраса, гараж і паркоўка.

У доме - цэнтралізаванае водазабеспячэнне і каналізацыя, ацяпленне на газе. Пры гэтым абсталяваны цёплыя падлогі, устаноўлены радыятары. На кожным паверсе ёсць сістэма вентыляцыі з рэкуперацыяй цяпла. Маецца кацёл Vaillant, бойлер на 600 літраў, сістэма падрыхтоўкі вады Amazon.

Акрамя ўбудаваных шаф, мэблі ў доме няма, але ёсць тэхніка: лядоўня, мікрахвалеўка, посудамыйка, пралкі, тэлевізар. Арандатары могуць карыстацца посудам і некаторай дробнай бытавой тэхнікай.

Палац размешчаны на пляцы, які займае 10 сотак, ён ахоўваецца. На прыдамавую тэрыторыю трапляюць праз вароты з дыстанцыйным кіраваннем і брамку з кодавым замком. Прастора каля дома - дагледжаны газон з дэкаратыўнымі раслінамі, на ім устаноўленая альтанка, таксама ёсць дзіцячая пляцоўка.

За месяц арэнды гаспадары хочуць атрымаць 6000 даляраў, ці 19 470 рублёў.