Конар МакГрэгар ацаніў свае шанцы на выбарах прэзідэнта Ірландыі

• 4.12.2023, 19:56

Былы чэмпіён UFC заявіў, што пры ім улада належала б усяму народу.

Ірландскі баец ММА Конар МакГрэгар заявіў у сацсетцы X, што быў бы больш прывабным кандыдатам на выбарах прэзідэнта, чым цяперашнія палітыкі.

Макгрэгар у апошнія тыдні неаднаразова выказваўся на тэму палітыкі, у тым ліку ў сувязі з нападам на дзяцей каля школы ў Дубліне, чаму паліцыя западозрыла яго ў распальванні міжнацыянальнай варожасці. Баец ММА і раней заяўляў пра магчымасць пайсці на выбары, адзначае Mirror.

«Патэнцыйная канкурэнцыя, калі я буду балатавацца. Джэры (Адамс), 78 гадоў. Берці (Ахерн), 75. Энда (Кені), 74 гады. Кожны з іх непарыўна звязаны з палітыкай сваёй партыі. Незалежна ад таго, што адчуваюць людзі па-за гэтымі партыямі. Гэтыя партыі кіруюць сабой, а не людзьмі. Ці я, 35-гадовы. Малады, актыўны, гарачы, свежы твар у гульні. Я слухаю. Я падтрымліваю. Я адаптуюся», – напісаў МакГрэгар.

Ён адзначыў, што ў выпадку ягонага абрання ва ўладзе быў бы не ён, а ўвесь народ Ірландыі.